ما اجمل هذا الدين
وما اكرمك يارب العالمين. كل حاجة بنعملها فى حياتنا بنؤجر عليها بس ناخد نيه.
افعال كتير
اتعودنا نعملها كل يوم وبقت عادة للأسف !!
واوقات مابنخدش بالنا اننا ناخد نيه :( ، مجرد النيه
هتحول الفعل دة من عادة إلى عبادة.
يلا كده نشوف
سيناريو يوم عادى بنعيشه كلنا ونشوف ازاى ربنا من كرمه علينا خلى كل حاجة بنعملها
بناخد عليها اجر بس لو اخدنا نيه ^_^ .
يلا نبدأ بأول ما
نصحى من النوم ........
مش هنتكلم عن الصلاة والعبادات لأن كلنا بنكون اكيد
وخدين فيها النيه انها لله.
خلينا نتكلم عن عادات مبنخدش فيها نيه واحنا بنعملها
.
ايه رأيك أول مانصحى من النوم اكيد هنقابل حد فى وشنا: والدك ، والدتك ، زوجتك ،
بنتك .....أى حد، يلا قوله
صباح الخير وخد نيه " الكلمه الطيبه صدقه" .
ممكن تكون صاحى من
النوم واكيد لسه ما فوقتش كدة بس حاول وياسلام لو قلت صباح الخير دة وانت مبتسم واخدت نيه " تبسمك فى
وجه أخيك صدقه".
لو لسه مافوقتش يبقى اكيد لازم تدخل تاخد شاور، طيب ماهى فرصه
اهى يلا خد نيه" النظافه من الإيمان".
وكمان وانت بتلبس خد نيه ان يكون مظهرك
حلو وخد نيه " إن الله جميل يحب الجمال" .
ها يا ترى نازل بسرعة
ومستعجل ولا هتلحق تفطر ، مش مشكله سواء فطرت فى البيت أو فى الشغل خد نيه أنك
تتقوى بالأكل على طاعه ربنا.
يلا
انزل بقى وروح شغلك وبلاش تروح زهقان أو متضايق لانك لو اخدت نيه "إذا أنفق
الرجل على أهله نفقه يحتسبها فهى له صدقه" اكيد دة هيهون عليك .
دة لو
انت بتشغل، طيب لو انت لسه طالب اكيد وانت رايح مدرستك او جامعتك تقدر تاخد نيه " من سلك طريقا
يلتمس فيه علما سهل الله له طريقا إلى الجنه" .
طيب وانت فى الطريق فى
تفاصيل صغيرة كدة ممكن تحصل تقدر برضوا تاخد بيها ثواب لو اخدت نيه. ياترى زى
ايه؟........زى مثلا لو
لاقيت طوبه او أزازة او قشرة موز اكيد عارف ايه النيه اللى هتخدها فى الحاله دة
" إماطه الاذى عن الطريق صدقه" .
طيب ايه مواقف تانيه ممكن تحصل
. ممكن مثلا تلاقى راجل
عجوز ماشى فى الشارع مش قادر يعدى فتاخد بأيدة وتعديه أو بقى لو ربنا كرمك وراكب
عربيتك ولاقيت نفس الراجل العجوز دة هدى السواقه شويه واديه فرصه يعدى وخد نيه
" كان الله فى عون العبد مادام العبد فى عون أخيه".
طيب الحمد
لله وصلت الشغل يلا بقى اشتغل
كويس وخد نيه" إن الله يحب إذا عمل احدكم عملا أن يتقنه" .
خلاص
خلصت الشغل ، ياة بسرعة كدة طيب لما تروح وتتغدى وتسترخى شويه وتروح عن نفسك يعنى
لو قدرت تخرج تتفسح مع اهلك او اصحابك لو مقدرتش وهتتفرج على حاجة كويسه تروح بيها عن نفسك خد نيه" روحوا
عن القلوب ساعة بعد ساعة، فإن القلوب إذا كلت عميت" .
وبعدين اقعد مع اهلك اتكلم معاهم
واطمن على احوالهم وخد نيه" خيركم خيركم لأهله".
طيب قربت تنام
خلاص ايه رأيك قبل لما تنام تعمل عادة حلوة كدة اسمها القراءة، أقرأ شويه وخد نيه تنفيذ أمر
ربنا" أقرأ بسم ربك الذى خلق".
يلا بقى تصبح على خير بس متنساش قبل لما تنام تاخد نيه أنك ترتاح
علشان تصحى تانى يوم تبدأ يوم جديد فى طاعة ربنا.
دة سيناريو ليومنا
يمكن مش كلنا بنمر بنفس الاحداث بالظبط بس اكيد فى حاجات مشتركه من الاحداث دي .المهم
انك متسبش اليوم يعدى منك كدة من غير ما تغتنمه . هى هى نفس الحاجات اللى بتعملها
برضوا هتعملها بس بنيه انها تكون خالصه لله وتحمد ربنا على كرمه وعطاءة انه سبحانه
وتعالى بيأجرنا على كل عمل بنعمله. يمكن فى الاول مش هتفتكر فى كل موقف تعمل كدة
بس جرب وحاول مرة فى مرة هتفتكر وتتعود ..
( بكيبوردى :مها فاضل )
أحد مؤسسي الفريق
احنا كفريق ( موسوعة نوايا ) هدفنا بإذن الله انشاء أول موسوعة .. للنوايا ..
في المدونة هتلاقي - في المستقبل القريب إن شاء الله - تدوينات هي عبارة عن نوايا فقط .. لكل الأحداث اللي بنمر بيها ..
سواء مناسبات ... أعمال يومية ... عبادات .. إلخ .
تابعونا ..
وانشر ..
تؤجر
(:
----
الفريق
ليست هناك تعليقات:
إرسال تعليق